Lés parlanjhes pi lés çhultures réjhiounàus en Novéle-Aguiéne

Maugrai que le s’éboujhant den daus situaciuns sociolenghistiques pa parélles, lés « parlanjhes-çhultures » de la Novéle-Aguiéne avant la maeme valour yin l’àutre, çheù débllamant ine acciun publlique adrojhàie pi adounàie a leù cas. L’anbllét de la Réjhiun pr lés parlanjhes é çhultures réjhiounàus ét cunséquent, cunstant é s’assolide cha petit.

La Réjhiun Novéle-Aguiéne définissit in pllan d’acciuns çhi encare lés préncipes, lés butàes, lés cundiciuns pi lés talles primàudes qu’o serat de besén de travallàe durant la bedàie 2021-2024 pr faere pr lés parlanjhes é çhultures réjhiounàus : le basque, l’ouccitan é le poetevin-séntunjhaes.

La poulitique d’acot aus parlanjhes réjhiounàus se batit entor de troes butàes :

• la passance : pr l’assaventement , l’éncitement éscolaere obe la formaciun daus adultes, mé étou la sensibllesaciun é l’acot a çhés parlanjhes aupràe daus famelles é daus mundes,
• la valourisaciun souciale : pr l’acot a la criaciun é a l’abenajhe de divarses formances d’éspréssiun é de pratiques çhulturales,
• l’éstructuraciun (butàe coumun riortai aus cundiciuns de fesajhe de l’éstratéjhie réjhiounale pr répounàe aus deùs butàes d’avant).

La Réjhiun Novéle-Aguiéne aquevalle lés fasours lenghistiques, artistiques é çhulturàus çhi sant d’assent ac çhéte poulitique çhulturale. Al acourse étou sés acciuns pr lés troes parlanjhes présents su sa tére ac l’acotement d’outis éstructurants qu’o sant l’Oufice publlic dau parlanjhe ouccitan (OPLO), le Cirdoc In’oc, l’Oufice publlic dau parlanjhe basque (OPLB), l’Énstitut çhulturàu basque (ICB) pi l’UPCP Métive.

La Réjhiun jhoue çhau rôle den le réspéc daus missiuns qu’o li balle la loe en matére de garde de sen identetai pi d’aviall aus parlanjhes réjhiounàus.