Cara, d’Oc é d’alloure
Mis à jour le 27 janvier 2023
Cara, d’Oc é d’alloure ét in prougrame mi en lan pi funsai pr le Cunséll départementàu de la Dordogne pi acotai pr le Cunséll réjhiounàu de la Novéle-Aguiéne. Denpis çheùques annàies, çhau prougrame ét in cunviment pr désabrjhàe la çhulture ouccitane, vrae vivante, en Dordogne.
Le vivàe ensenblle a trac l’ouccitan
Le prougrame Cara, d’Oc é d’alloure cunvie lés demourants de totes lés ajhes a se ramoucelàe den in moument d’échanjhes pi de vivanjhe. Le prougrame chareye daus valours d’égaletai, de réspéc é de partajhe çhi assoutrant denpis trjhou la çhulture ouccitane pi batit le vivàe ensenblle pr la décache de l’àutre.
Cara, d’Oc é d’alloure s’épare en tot pllén de formances, su troes moes, durant daus éstajhes, atelàes, jhoueries, cunférences, dances, liries, bals tradiciounàus, chants polifoniques, pouésie chantàie, ac en fil rojhe a totes çhélés formances d’éspréssiun, l’art troubadour : den le maeme tenp art tradiciounàu pi enprénte daus criaciuns d’aneùt prpousàies durant le féstivàu, den tot pllén d’endréts dau département de la Dordogne : Ézies-de-Tallat, Bourdéll, Ribérat, Brjherat, Tivàe, etc.
Cara boutre la décanpe portàie pr la Réjhiun Novéle-Aguiéne den sa poulitique çhulturale pr garanti pi passàe l’ouccitan pr valourisàe le parlanjhe d’Oc é pu jhenéraument la çhulture ouccitane durant lés mouments chalourous çhi créyant daus éspériences éspéciales.
In petit d’istoere
Le parlanjhe ouccitan ét in parlanjhe rouman tot paréll queme l’éspagnàu, le françaes obe l’itallén. L’ét coulai den in érajhe çhulturàu quemençai a la Moyéne Ajhe ac lés troubadours. Le parlanjhe d’oc étét atou çhau daus écrivajhes admenistratifs é le françaes devénghit le parlanjhe « ouficiàu » rén qu’a tiràe dau sésiàeme séclle. L’ouccitan rechterat luntenp le parlanjhe dau peùplle, çhau çhi se càuse a cha jhor.
Aneùt sét dau cent daus demourants daus téres ouccitanofones de Novéle-Aguiéne causant, çheù veùt dire 231000 mundes (a la baesse a prpous de 2008).
